Gala-forýmǵa 1500-den astam jastar ókilderi, sondaı-aq Parlament depýtattary, memlekettik organdar men «Nur Otan» partııasynyń basshylyǵy jáne qalyń jurtshylyq qatysty.
Forýmdy ashqan Gúlshara Ábdiqalyqova Elbasy Nursultan Ábishuly Nazarbaevtyń quttyqtaý sózin oqyp berdi.
Onda «Jas Otan» Memleket basshysynyń barlyq bastamalary men strategııalyq josparlarynyń senimdi tiregine aınalǵany, bul bedeldi uıym myńdaǵan bilimdi de belsendi jastardyń, Qazaqstannyń naǵyz patrıottarynyń basyn biriktirip otyrǵany atap ótilgen.
Táýelsizdiktiń alǵashqy kúnderinen bastap jastar máselesi memlekettiń udaıy nazarynda. Qazir búkil álem Tórtinshi ónerkásiptik revolıýsııa dáýirine qadam basty. Uzaq merzimdi maqsattarǵa qol jetkizý úshin elde saıası, ekonomıkalyq, rýhanı jáne áleýmettik jańǵyrýlar qolǵa alyndy. «Bolashaqqa baǵdar: rýhanı jańǵyrý» atty baǵdarlamalyq maqalada HHI ǵasyrdaǵy ulttyq sana týraly aıtylyp, taıaý jyldarda qolǵa alýdy qajet etetin mindetterge erekshe nazar aýdaryldy. Olar: latyn álipbıine kóshý, «Sıfrlyq Qazaqstan» baǵdarlamasy, úsh tilde bilim berý jáne t.b. Bul úshin sapaly bilim berýge jáne biliktiligi joǵary jas mamandar daıarlaýǵa erekshe kóńil bólý kerek. «Jańa álemge jol salamyz» degen sezd ataýy Qazaqstan jastarynyń jańa bilim men ınnovasııaǵa degen umtylysyn ańǵartady.
Prezıdent jastardy jan-jaqty damýǵa – sportpen, ónermen aınalysýǵa, shet tilderin úırenýge, otandyq jáne álemdik ádebıettiń baı murasyn tanyp-bilýge, eń bastysy, álemdik deńgeıdegi kásibı maman bolýǵa shaqyrdy.
Sezd alǵash ret VR (virtual reality) formatynda kórsetildi. Bul tehnologııa kez kelgen Internet paıdalanýshysyna zaldaǵy kórinistiń barlyǵyn 360 gradýs aınalasynda kórýine múmkindik beredi.
«Rýhanı jańǵyrý», «Sıfrlyq Qazaqstan», «Qazaqstanda jasalǵan», «Bilim. Ǵylym. Innovasııa», «Salamatty ult» tárizdi 5 seksııalyq baǵyt boıynsha taqyryptyq jobalar ázirlendi.
«Jas Otan» jastar qanatynyń IV sezi sanany jańǵyrtýǵa jáne Qazaqstan jastarynyń jahandyq básekege qabiletti bolýyna baǵyttalǵan jastar saıasatynyń jańa formaty aıasynda ótkizildi.
